酒店 package 原來只送了一天的早餐，選了今早去吃，我又失眠了，晨早七點就叫波比起身陪我去食早餐
餐廳在一樓，一入去，嘩嘩嘩，超級無敵大海景加落地玻璃，個 view 太正了
早到所以有窗口位，嘻，早起的鳥兒有蟲吃
食物嘛，中規中矩，係可以嚐到沖繩的菠蘿，又甜又多汁，好吃到暈
加上陽光與海景，有時間的話呆坐一個鐘慢喝咖啡也是嘗心樂事
吃罷早餐，時間尚早，與波比行行附近的海洋博公園啦, 順便認一認路, 今日黃昏會到水族館,
從酒店行過去, 真係超近!
早上藍天白雲, 看看海, 風景十分之美~
點知行行吓，收到一陣浮潛的 Top Marine 來電，問我喺邊，我話喺水族館嗰頭，佢話要我 9:30到，否則唔等我。。。
我即刻啞晒，因為之前聯絡明明話10:00am 集合，一路十冇叫過我哋要早半個鐘到喎， 我揸車去要成個鐘，而家 8:45am, 咁你想我點??
於是就拿拿聲開車，因為冇 IC 行，我盡力地飛車，趕呀趕，竟然 9:35am到了，但問題又出現了，map code 顯示我們到了，但找不到店子，我停了車打俾佢，但又好難講到佢聽我位置。。。
於是把車子回頭駛了一段路，再邊行邊望，且。。。原來頭先停車個位咪係囉，一來俾佢網頁張相呃晒，個門口都完全唔同樣嘅!!!
二來佢舖頭招牌原來係冇英文，我一路都望唔到 Top Marine 的字眼，回頭行第二次時見到啲日文，腦海中讀出嚟先知原來呢個日文名就係 Top Marine....啞晒。。。。。
浮潛的介紹, 上一篇寫了, 提到我暈浪, 回到舖頭換埋衫都仲好想嘔.....
最後, 由波比先生揸了幾百米的車, 去了間都出名的元祖紅芋手信店行行, 等到唔暈先繼續行程
本來諗住呢d 店好遊客 FEEL, 點知意外地好行,
所有小甜點都有得試食, 試得波比不知幾開心, 試完就買咗幾盒紅芋批, 因為真係幾好食!
紅芋批就是在這裡新鮮製造
超香的蕃薯味呀!
除了紅芋批, 我們又買了辣椒油, 辣椒粉同濃縮柑汁, 那支柑汁好得, 加水飲完就冇晒想嘔的感覺~
這裡仲有雪糕同 cake 的小 cafe, 可惜還有點反胃所以冇試~
我們帶著浮潛送的小鯨鯊再上路, 目的地是 Neopark 動物園
這個動物園, 冇乜人, 全程我們見到得十幾個遊人,
一入去, 是放養的雀鳥區, D 大鳥就在你身旁行來行去, 好攪笑~
其實這動物園大部分的動物都是放養, 都可以近距離接觸~ 而不是一個籠困住一隻動物咁~
行隧道, 隔離是百年古魚, 大條到嚇死人!
擋路的雀仔, 好紅!
最開心是去了可愛動物園區, 不過要另俾 300 Yen 入場, 入面有大黑豚啊!!!
旁邊有食物, 遊人可自由拎嚟餵豬豬
又有河豬
波比餵得最開心, 河豬有兩個大水池, 三十幾度隻隻都浸晒落去, 不過......
佢哋又喺個水池大大喎, 咁...... 佢哋身上其實充滿 S 水.......
波比餵餵吓, 河豬一 fing...... 後果大家想像一下 XD
愛小狗的, 可入去抱抱小狗, 仲有羊咩, 大狗, 白兔, 天竺鼠等等
魚池的魚, 超醒, 一行過已經圍晒過嚟, 以為我會餵佢
再入另一個放養區, 見到好多好多開晒屏嘅孔雀, amazing!!!!
去過 n 次動物園, 都係第一次見到孔雀肯開屏, 大概是幸運地遇上了牠們求偶的時間,
男的望到實女的, 開到個屏大一大, 仲不時震震吓嚟吸引佢注意, 好好睇!
但係, 女的就是不屑一顧, 場面實在攪笑~
之後, 仲有豬, 今之是小野豬
好可愛!
打呵欠~
仲有小袋鼠, 又可以餵飼, 很自由, 因為日本人相信遊人會守禮~
行完了, 最後有個小小火車館
離開時, 烈日當空, 我的 Note 仔同一舊舊的浮雲, 超愛這張相~
差不多兩點了, 本來是打算揸車去古宇利島食海膽飯, 但時間遲了, 唯有放棄,
Task oriented 的老婆只求醫飽個肚, 打算求其有咁近得咁近搵間舖頭食D 嘢就算,
係為食老公堅持要 search 吓 google map, 就發現幾百米外的大型停車場附近, 就有 CoCo 壱番屋
入到去, 有卡位, menu 有日文又有英文,
這裡點餐非常之 flexible, 飯的多少, 咖哩的辣度都可以自選, 仲有好多配菜可加
我點了這個什菜咖哩漢堡飯, 超豐富啊!!! 有很多不同的蔬菜在咖哩內, 漢堡又很 juicy, 100分!!
波比的咖哩吉豬飯, 沖繩D 豬, 點解咁好食o架???
炸完都一D 都唔會乾, 肉味很重, 咖哩辣得恰到好處, 又是 100分~
最愛日本的餐廳, 好多都係一枱一壺冰水自己斟, 啱晒熱到溶咗的我們~
呢度最正, 係竟然有一大個漫畫書櫃, 波比攞咗最新一期的 One Piece 嚟送飯, 睇到唔捨得走!
飯後, 在對面的一間超大型家品店行行, 嘩, 我喺 100Yen 店的部分買咗好多小廚具, 好開心~
[2013 沖繩夏日遊記] 不可思議的 $665 之旅
[2013 沖繩夏日遊記] 琉球珈啡館 x 奧武山公園跑步去
[2013 沖繩夏日遊記] 日本租車自駕小貼士
[2013 沖繩夏日遊記] Ashibinaa Outlet x 追風丸拉麵
[2013 沖繩夏日遊記] 沖繩浮潛大比拼 Top Marine vs. Marururoa
[2013 沖繩夏日遊記] チサン リゾート 沖縄美ら海 x 海邦丸
[2013 沖繩夏日遊記] Neopark 動物園 x CoCo 咖哩屋
[2013 沖繩夏日遊記] 沖縄美ら海水族館
[2013 沖繩夏日遊記] 海洋博公園 x 燒肉牧場
[2013 沖繩夏日遊記] 夢想的沖繩海邊跑步
[2013 沖繩夏日遊記] Bios 之丘 - 放羊探豬去
[2013 沖繩夏日遊記] 美國村 x ぎょれん鮮魚卸売市場
[2013 沖繩夏日遊記] 最終回 - 那霸市暖暮拉麵 x 跑跑步 x Bambohe 燒肉放題
-1.jpg)
.jpg)
沒有留言:
發佈留言